Дорноговь аймаг дахь Эрүүгийн хэргийн анхан шатны шүүхийн 2023.12.20-ны өдрийн 217 дугаартай шийдвэр
Шүүхийн шийдвэрийн тойм №.01 2024.01.04
Шийдвэрийн төлөв: Хуулийн хүчин төгөлдөр болоогүй
Шүүгдэгч О нь согтуугаар 2023 оны 09 дүгээр сарын 13-ны өдөр Дорноговь аймгийн Даланжаргалан сумын 4 дүгээр багийн нутаг дэвсгэрт байрлах Наадмын талбайн төв асрын дэргэд Д.Х-г зүй бус, хууль бус үйлдлийн улмаас түүнтэй маргалдаж, улмаар түүний хэвлий, баруун бугалга хэсэгт хутгаар 2 удаа хутгалж эрүүл мэндэд нь хэвлийн хөндийн нэвтэрсэн шарх, сэмжний урагдал, баруун бугалгын a.brachialis, n.medianus судасны тасрал, баруун бугалгын урагдал шарх гэмтлүүд бүхий хүнд хохирол санаатай учруулсан гэмт хэрэгт холбогдуулан Эрүүгийн хуулийн тусгай ангийн 11.1 дугаар зүйлийн 2 дахь хэсгийн 2.4-т заасан гэмт хэрэгт холбогдуулан яллах дүгнэлт үйлдэж гэм буруутай эсэхийг шийдвэрлүүлэхээр хэргийг шүүхэд шилжүүлсэн байна.
Хохирогчийн Монгол Улсын Үндсэн хууль, Хүний эрхийн түгээмэл тунхаглал болон Эрүүгийн хуулиар хамгаалагдсан халдашгүй дархан байх эрхийг зөрчиж түүнийг 2 удаа хутгалсан үйлдлийн улмаас түүний эрүүл мэндэд хүнд хохирол учирсан нь Эрүүгийн хуулийн тусгай ангийн 11.1 дүгээр зүйлийн 2 дахь хэсгийн 2.4-т заасан зэвсгийн чанартай эд зүйлийг хэрэглэн хүний эрүүл мэндэд хүнд хохирол санаатай учруулах гэмт хэргийн объектив шинжийг, шүүгдэгч өөрийн үйлдлийн нийгмийн аюулыг ухамсарлаж өөрийн үйлдлийн улмаас хүний эрүүл мэндэд хохирол учирч болохыг мэдсээр байж хүсэж зориуд хүнд хохирол учруулсан нь субьектив шинжийг тус тус хангадаг.
Санаа сэтгэл хүчтэй цочрон, давчдах байдлын урьдач нөхцөл нь хохирогчийн зүгээс нэг удаагийн төдийгүй байнгын шинжтэй хүч хэрэглэн дарамтлах, хүндээр доромжлох хууль бус үйлдлийн хариу болж үүссэн, цочрон давчдах шууд шалтгаан нь хохирогчийн хууль бус үйлдэлтэй холбоотой, хүлээгдээгүй нөхцөл байдал үүсэж, түргэн зуур болдог онцлогтой.
Шүүхээс шүүгдэгч О нь уг гэмт хэрэг үйлдэх болсон урьдач нөхцөл буюу “хохирогчтой урьдын хувийн таарамжгүй харилцааны явцад бий болсон асуудлаас болж хохирогч болон шүүгдэгч нар нь хоорондоо маргалдан, зодолдож улмаар шүүгдэгч нь гутлынхаа түрийнд байсан хутгыг авч хохирогчийн хэвлий болон баруун гарт хутгалсан идэвхитэй, хохирогч руу шууд чиглэсэн үйлдлийг гаргасан байна.
Үүнийг шүүх хохирогчийн зүй буй үйлдлээс болж шүүгдэгч нь сэтгэл санааны гэнэтийн цочролд хоромхон зуур автаж, сэтгэцийн хэвийн байдал алдагдсаны улмаас түрхэн зуурын агшинд хохирогчийн эрүүл мэндэд хүнд хохирол учруулсан байна гэж үзэхгүй.
Шүүхээс О-г Зэвсгийн чанартай эд зүйл ашиглаж Хүний эрүүл мэндэд хүнд хохирол санаатай учруулах гэмт хэргийг үйлдсэн гэм буруутайд тооцож, түүнийг 05 жилийн хугацаагаар хорих ял шийтгэсэн байна.
Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.
Шүүхийн шийдвэрийг бүтнээр харах цахим холбоос:
Тоймыг бэлтгэсэн: Дорноговь аймаг дахь Сум дундын эрүүгийн хэргийн анхан шатны шүүхийн шүүгч Б.Одбаяр