Дорноговь аймаг дахь Сум дундын Эрүүгийн хэргийн анхан шатны шүүхийн 2023 оны 02 дугаар сарын 28-ны өдрийн 42 дугаартай шийдвэр
Тоймын огноо, дугаар: 2023.06.23-ны №43
Тоймын төрөл: шүүхийн шийдвэрийн тойм
Шийдвэрийн төлөв: Хүчин төгөлдөр болсон
Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.
Э.С нь хохирогч Б.Б-г зөвшөөрөлгүй данснаас мөнгө авсан гэж маргалдан зодож, хохирогчийн хамт согтууруулах ундаа хэрэглэж улмаар хийд орох зорилгоор … улсын дугаартай тээврийн хэрэгслээр Б.Б-тай хамт явах замдаа түүнийг машинд бөөлжлөө гэж замаас зүүн тийш 2 км зайд байрлах газарт машинаасаа буулган орхиж явснаас Б.Б осгож амь нас нь хохирсон байна.
Прокуророос хохирогчийн биеэ хамгаалж чадахгүй болохыг мэдсээр байж санаатай алсан гэх хэрэгт холбогдуулан яллах дүгнэлт үйлдэж гэм буруутай эсэхийг шийдвэрлүүлэхээр, шүүгдэгчийн өмгөөлөгчөөс “шүүгдэгч нь хохирогч Б-ыг нас барахад хүргэсэн шууд санаатай идэвхтэй үйлдэл гаргаагүй. Эрүүгийн хуулийн тусгай ангийн 10.1 дүгээр зүйлийн 2 дахь хэсгийн 2.7-д заасан гэмт хэргийг үйлдсэн гэж үзэх үндэслэлгүй байна…..гэсэн үндэслэлээр хэргийг хэрэгсэхгүй болгож өгнө үү гэсэн саналыг гаргаж шүүх хуралдаанд оролцсон байна.
“Хүнийг алах” гэмт хэрэг нь бусдын амь насыг хохирооход чиглэсэн идэвхтэй үйлдлээр илэрдэг ба санаатай үйлдэл хийсний улмаас хүний амь нас хохирсон байх бөгөөд гэмт үйлдэл, сэдэлт зорилго нь амь хохирогчийн үхэл хоёрын хооронд шалтгаант холбоотой байх шинжийг агуулдаг.
Харин гэм буруугийн болгоомжгүй хэлбэрийг өөрийн үйлдэл, эс үйлдэхүйг хууль бус шинжтэй болохыг ухамсарлаж түүний улмаас хохирол, хор уршиг учрах боломжтойг урьдчилан мэдэж түүнийг гаргахгүй байж чадна гэж тооцсон боловч хохирол, хор уршиг учирсан, эсхүл хохирол,хор уршиг учрах боломжтойг урьдчилан мэдэх ёстой, мэдэх боломжтой байсан боловч мэдэлгүй үйлдсэний улмаас хохирол хор уршиг учирсан байсанд оршдог.
Шүүхээс Э.С-г хохирогчийг хөдөө хээр орхиж явахад амь насанд нь аюул учрах нөхцөл байдал бий болохыг мэдэх боломжтой байхад мэдэлгүй, хээр орхиж явснаас осгож нас барсан болох нь тогтоогдсон гэж үзэн прокуророос яллах дүгнэлт үйлдсэн хуулийн зүйлчлэлийг өөрчлөн хүний амь насыг болгоомжгүйгээр хохироосон гэж үзэн гэм буруутайд тооцож, түүнийг гэмт хэрэг үйлдсэн гэм буруугаа хүлээн зөвшөөрсөн, эрүүл мэндийн байдлыг нь харгалзан 2 жилийн хорих ялыг, нээлттэй хорих байгууллагад эдлүүлэхээр шийдвэрлэсэн байна.
Шүүхийн шийдвэрийг бүтнээр харах цахим холбоос: https://shuukh.mn/single_case/85978?daterange=2023-01-01%20-%202023-05-29&id=1&court_cat=2&bb=1
Тойм бэлтгэсэн: Дорноговь аймаг дахь Сум дундын эрүүгийн хэргийн анхан шатны шүүхийн шүүгч Д.Адъяасүрэн