Дорноговь аймгийн Эрүү, Иргэний хэргийн давж заалдах шатны шүүхийн 2023.09.06-ны өдрийн магадлал №2023/ДШМ/21
Шүүхийн шийдвэрийн тойм №47, 2023.10.20
Шийдвэрийн төлөв: Хүчин төгөлдөр болсон.
Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.”
Прокуророос шүүгдэгч Г-г ганцаараа болон Е-ээр дамжуулан 2 удаагийн үйлдлээр …хүнсний дэлгүүрээс хүнсний зүйл худалдан авахдаа ХААН банкны интернэт банкны “захиалгат гүйлгээ” гэсэн цэсийг ашиглан зарлага гаргасан дүр үзүүлж “гүйлгээ амжилттай” гэсэн төлөвийг худалдагчид үзүүлж дансанд мөнгө байхгүй байгаа бодит байдлыг нуух замаар бусдыг төөрөгдөлд оруулж залилсан буюу Эрүүгийн хуулийн тусгай ангийн 17.3 дугаар зүйлийн 1-д заасан гэмт хэргийг шүүгдэгч Г дангаараа болон Е-тэй бүлэглэж үйлдсэн гэж яллуулахаар шүүхэд шилжүүлснийг анхан шатны шүүх хянан хэлэлцээд шүүгдэгч Е-д холбогдох хэргийг хэрэгсэхгүй болгож, шүүгдэгч Г-г гэм буруутайд тооцож, эрүүгийн хариуцлага хүлээлгэсэн байна.
Прокурорын эсэргүүцлээр давж заалдах шатны шүүх хэргийг бүхэлд нь хянан хэлэлцээд шүүгдэгч Г-г дансаа мөнгөгүй байгааг мэдсээр байж цахим хэрэгсэл ашиглаж, зохиомол байдлыг зориудаар бий болгож, бодит байдлыг нуух замаар бусдыг төөрөгдөлд оруулж, бусдын эд хөрөнгийг хууль бусаар шилжүүлж авсан буюу залилах гэмт хэргийг үргэлжилсэн үйлдлээр үйлдсэн нь тогтоогдсон, харин шүүгдэгч Е нь шүүгдэгч Г-тэй анхнаасаа санаа зорилгоо нэгтгэн үгсэн тохирч залилах гэмт хэргийг бүлэглэж үйлдсэн гэх нөхцөл байдал хэрэгт тогтоогдоогүй байна гэж анхан шатны шүүх дүгнэсэн нь хэргийн бодит байдалд нийцсэн гэж үзэж, прокурорын гаргасан эсэргүүцлийг хэрэгсэхгүй болгож шийдвэрлэсэн.
Шийдвэрийг бүтнээр харах цахим холбоос: https://shuukh.mn/single_case/17774?daterange=2023-01-01%20-%202023-10-22&id=2&court_cat=2&bb=1
Тоймыг бэлтгэсэн: Дорноговь аймгийн Эрүү, Иргэний хэргийн давж заалдах шатны шүүхийн шүүгч А.Сайнтөгс