Дорноговь аймаг дахь Эрүүгийн хэргийн анхан шатны шүүхийн 2024.06.04-ний өдрийн 133 дугаартай шийдвэр
Шүүхийн шийдвэрийн тойм №11 2024.06.04
Шийдвэрийн төлөв: Хуулийн хүчин төгөлдөр болоогүй.
Прокуророос иргэн Б.Б, Н.Э, Г.Ш, Ё.Э, Б.М нар нь урьдчилан үгсэн тохиролцож, бүлэглэн 2019 оны 12 дугаар сарын эхэн үеэс 12 дугаар сарын 27-ны өдрийг хүртэлх хугацаанд Дорноговь аймгийн Сайхандулаан сумын 4 дүгээр багийн нутаг дэвсгэрт байрлах Тольт гэх газраас тусгай зөвшөөрөлгүйгээр бусдыг хөлсөөр ажиллуулан, ашигт малтмал олборлох үйл ажиллагаа явуулж, байгаль орчинд нийт 9.000.000 төгрөгийн хохирол учруулж, 716.872.000 төгрөгийн үнэ бүхий ашигт малтмалыг олборлож, хууль бусаар газрын хэвлийд халдсан буюу хууль бусаар ашигт малтмал ашигласан, олборлосон гэх хэрэгт холбогдуулан яллах дүгнэлт үйлдэж гэм буруутай эсэхийг шийдвэрлүүлэхээр хэргийг шүүхэд шилжүүлсэн байна.
Шүүхээс шүүгдэгч Б.Б, Н.Э, Г.Ш, Ё.Э, Б.М нарт холбогдох хэргийг хянан шийдвэрлэж, шүүгдэгч нарыг Эрүүгийн хуулийн тусгай ангийн 24.2 дугаар зүйлийн 1 дэх хэсэгт заасан тусгай зөвшөөрөлгүйгээр ашигт малтмалын олборлолт явуулж, хууль бусаар газрын хэвлийд халдсан гэмт хэргийг бүлэглэж үйлдсэн гэм буруутайд тооцож, шүүгдэгч Г.Ш, Н.Э нарыг тус бүрийг 8.000.000 төгрөгөөр, шүүгдэгч Б.Б, Ё.Э, Б.М нарыг тус бүрийг 6.000.000 төгрөгөөр тус тус торгох ял шийтгэж, гэмт хэрэг үйлдэхдээ ашигласан …. улсын дугаартай Ниссан Сафари маркийн тээврийн хэрэгслийн үнэ болох 12.000.000 төгрөг, …. Тоёота Ист маркийн тээврийн хэрэгслийн үнэ 4.500.000 төгрөг, нийт 16.500.000 төгрөгийг тэнцүү хувааж шүүгдэгч тус бүрээс 3.300.000 төгрөгийг, гэмт хэрэг үйлдэж олсон орлого болох 716.872.000 төгрөгийг шүүгдэгч Б.М-ээс 72.000.000 төгрөг, шүүгдэгч Г.Ш-ээс 65.000.000 төгрөг, шүүгдэгч Ё.Э-с 61.900.000 төгрөг, шүүгдэгч Б.Б-ээс 73.000.000 төгрөг, шүүгдэгч Н.Э-ээс 382.972.000 төгрөг, иргэний хариуцагч Б.Н-ээс 62.000.000 төгрөгийг тус тус гаргуулж улсын орлого болгохоор, энэ хэрэгт эд мөрийн баримтаар хураагдан ирсэн 2 ширхэг алт хайгчийг улсын орлого болгохоор шийдвэрлэсэн.
Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.
Тоймыг бэлтгэсэн: Дорноговь аймаг дахь Сум дундын эрүүгийн хэргийн анхан шатны шүүхийн Ерөнхий шүүгч Б.Байгалмаа