ДОРНОГОВЬ АЙМГИЙН ШҮҮХ
Дорноговь аймгийн Эрүү, Иргэний хэргийн давж заалдах шатны шүүхийн 2022.12.05-ны өдрийн магадлал, №2022/ДШМ/51
Шүүхийн процессын тойм №18
Шийдвэрийн төлөв: Хүчин төгөлдөр болсон.
САНАМЖ: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.
Прокуророос яллагдагч С-д холбогдуулан ... нягтлан бодогчоор ажиллаж байх хугацаандаа тус байгууллагын ажилчдад цалин олгох ... баримтыг засварлаж өөрийн цалингийн тооцоог илүү бодож 2021 оноос 2022 оны 07 дугаар сар хүртэлх хугацаанд Төрийн сангаар дамжуулан нийт 166,612,585 төгрөгийг албан тушаалын байдлаа ашиглаж, бусдад их хэмжээний хохирол учруулж завшсан буюу хөрөнгө завших гэмт хэргийг үйлдсэн гэж үзэж яллах дүгнэлт үйлдэж, хэргийг шийдвэрлүүлэхээр шүүхэд шилжүүлжээ.
Анхан шатны шүүх яллагдагчийн өмгөөлөгчийн хүсэлтийн дагуу урьдчилсан хэлэлцүүлэг явуулж “ ... яллагдагч С-г ... бусдын итгэмжлэн хариуцуулсан эд хөрөнгийг завшсан хэрэгт нотлох баримт авагдаагүй, эсхүл албан тушаалтан албан үүрэг, бүрэн эрх, албан тушаалын байдлаа урвуулан ашиглах гэмт хэрэгт холбогдуулан шалгах тохиолдолд харьяалал зөрчсөн ба энэ нь Эрүүгийн хэрэг хянан шийдвэрлэх тухай хуулийг ноцтой зөрчсөн гэж үзнэ” гэсэн дүгнэлт хийж яллагдагчийн өмгөөлөгчийн хүсэлтийг хангаж, хэргийг прокурорт буцаахаар шийдвэрлэснийг прокурор эс зөвшөөрч эсэргүүцэл бичсэн.
Давж заалдах шатны шүүхээс анхан шатны шүүхийн энэхүү дүгнэлт нь хэргийн бодит байдалтай нийцээгүй, анхан шатны журмаар хэрэг хянан шийдвэрлэх ажиллагаа нь тухайн шүүгдэгчийн хувьд прокуророос шүүхэд шилжүүлсэн эрүүгийн хэргийн хүрээнд явагдах тухай Эрүүгийн хэрэг хянан шийдвэрлэх тухай хуульд заасан хэрэг хянан шийдвэрлэх ажиллагааны хэмжээ хязгаарыг анхан шатны шүүх зөрчсөн гэж үзсэн.
Эрүүгийн хэрэг хянан шийдвэрлэх тухай хуульд зааснаар анхан шатны шүүх прокуророос шүүхэд шилжүүлсэн эрүүгийн хэргийг хүлээж авснаас хойш 15 хоногийн дотор яллагдагчийг шүүхэд шилжүүлэх, хэргийг прокурорт буцаах, хэргийг түдгэлзүүлэх, хэргийг харьяалах шүүхэд шилжүүлэх гэсэн шийдвэрүүдийн аль нэгийг гаргадаг.
Иймээс анхан шатны шүүх хэргийг прокурорт буцаасан нь буруу тул давж заалдах шатны шүүхээс анхан шатны шүүхийн энэхүү шийдвэрийг зөвтгөж Эрүүгийн хэрэг хянан шийдвэрлэх тухай хуулийн 39.9 дүгээр зүйлийн 1 дэх хэсгийн 1.4-д зааснаар хэргийн зүйлчлэлийг хүндрүүлэхгүйгээр ... анхан шатны шүүхийн шийдвэрт “Хэргийг яллагдагчийг шүүхэд шилжүүлэх шатанд хэлэлцүүлэхээр тогтоож” гэж өөрчлөлт оруулж, хэргийг анхан шатны шүүхэд буцааж, дахин хэлэлцүүлэхээр шийдвэрлэж, энэ үндэслэлээр прокуророос гаргасан эсэргүүцлийг хангаж шийдвэрлэх нь зүйтэй гэж шүүх бүрэлдэхүүн үзсэн.
Шийдвэрийг бүтнээр харах цахим холбоос: https://shuukh.mn/single_case/16199?daterange=2022-01-01%20-%202023-03-16&id=2&court_cat=2&bb=1
Тоймыг бэлтгэсэн: Дорноговь аймгийн Эрүү, Иргэний хэргийн давж заалдах шатны шүүхийн шүүгч А.Сайнтөгс
