: 70522144 : dornogovi_tg@shuukh.mn

"Монголын шүүхийн шилжин явах цомын төлөөх хөлбөмбөгийн аварга шалгаруулах тэмцээн-2019" тэмцээн амжилттай болж өндөрлөлөө.


Нийслэлийн эрүү, иргэний хэргийн давж заалдах шатны шүүхээс санаачлан Нийслэлийн шүүхүүдийн дунд хөлбөмбөгийн аварга шалгаруулах тэмцээн 2016 оноос уламжлал болгон зохион байгуулагдсан бөгөөд 2018 онд Улсын Дээд шүүхээс Монгол улсын нийт шүүхүүдийн дунд зохион байгуулсан нь тэмцээнийг улам өргөн хүрээтэй, өрсөлдөөнтэй болгосон юм. “Монголын шүүхийн шилжин явах цомын төлөөх Хөлбөмбөгийн аварга шалгаруулах тэмцээн-2018” тэмцээнд Дорноговь аймаг дахь шүүхийн тамгын газрын баг тамирчид шөвгийн 4-т шалгарсан амжилтаараа 2019 онд уг тэмцээнийг зохион явуулах  эрхийг гардан авсан билээ.
“Монголын шүүхийн шилжин явах цомын төлөөх Хөлбөмбөгийн аварга шалгаруулах тэмцээн-2019” тэмцээн Дорноговь аймгийн Сайншанд хотноо 2019 оны 10 дугаар сарын 04-05-ны өдрүүдэд амжилттай зохион байгуулагдаж өндөрлөлөө.
Дорноговь аймаг дахь шүүхийн тамгын газрын дарга Б.Бээжин тэмцээний арга хэмжээг нээж тэмцээнд оролцогч шүүхүүдийн баг тамирчидад хандан хэлсэн үгэндээ “...уг тэмцээнд Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхийн шүүгч, сагсан бөмбөгийн спортын мастер С.Олзод, Төв аймаг дахь сум дундын эрүүгийн хэргийн анхан шатны шүүхийн шүүгч, волейболын спортын мастер Ш.Гандансүрэн, Улсын дээд шүүхийн захиргаа удирдлагын хэлтсийн шинжээч, хөлбөмбөгийн спортын мастер А.Эрдэнэт, хөнгөн атлетикийн спортын мастер Г.Манлайбаатар зэрэг спортын мастер цолтой тамирчин 8, дэд мастер цолтой тамирчин 5, Нийслэлийн эрүү, иргэний хэргийн давж заалдах шатны шүүхийн шүүгч, хөлбөмбөгийн спортын нэгдүгээр зэрэгтэй тамирчин М.Алдар зэрэг спортын нэгдүгээр зэрэгтэй тамирчин 12, спортын хоёрдугаар зэрэгтэй тамирчин 7 тус тус оролцож байгаа нь бидний зохион байгуулж буй тэмцээний цар хүрээ, чанар чансааг тодорхойлж байгаа хэрэг тул Дорноговь аймаг дахь шүүхийн тамгын газрын хамт олны өмнөөс болон хувиасаа талархалтай байна....” хэмээн хэлэв.
Тэмцээний нээлтийн ажиллагааны үеэр спортын мастер Б.Бээжин, Баянзүрх, Сүхбаатар, Чингэлтэй дүүргийн эрүүгийн хэргйин анхан шатны шүүхийн шүүгч, сагсан бөмбөгийн спортын мастер С.Олзодын хүү О.Буянжаргал, Дорноговь аймаг дахь шүүхийн тамгын газрын жолооч, хөнгөн атлетикийн спортын мастер Г.Манлайбаатарын хүү М.Энэрэл нар уг тэмцээний нээлтийн бөмбөгийг өшиглөж тэмцээний бөмбөгийг тоглолтод орууллаа.
Тэмцээний нээлтийн ажиллагаанд Нийслэлийн эрүү, иргэний хэргийн давж заалдах шатны шүүхийн Ерөнхий шүүгч Т.Өсөхбаяр, шүүгч М.Алдар, Говьсүмбэр аймгийн Эрүү, Иргэний хэргийн давж заалдах шатны шүүхийн шүүгч Г.Тэгшсуурь, Төв аймаг дахь шүүхийн тамгын газрын дарга Д.Мөнхбат, Дундговь аймаг дахь шүүхийн тамгын газрын дарга А.Лхагвасүрэн, Баянзүрх дүүргийн иргэний хэргийн анхан шатны шүүхийн тамгын газрын дарга Б.Энхсайхан, Сүхбаатар, Чингэлтэй дүүргийн иргэний хэргийн анхан шатны шүүхийн тамгын газрын дарга Д.Болор оролцсон.
            Тэмцээний нээлтийн ажиллагааны үеэр Дорноговь аймгийн “Дорноговь-DTV” телевиз сурвалжлан ажилласан юм. 
Тэмцээнд нийт 12 багийн 200 гаруй тамирчид өрсөлдсөнөөс А.Эрдэнэт ахлагчтай Улсын Дээд шүүхийн баг тамирчид гурав дахь удаагаа түрүүлж, алтан медаль, аваргын цом хүртэв. Мөн Х.Гантулга ахлагчтай Захиргааны хэргийн давж заалдах шатны шүүх, Нийслэлийн захиргааны хэргийн анхан шатны шүүхүүдийн хамтарсан баг аман хүзүүдэж мөнгөн медаль авсан бол, И.Амартөгс ахлагчтай Баянзүрх, Сүхбаатар, Чингэлтэй дүүргийн Иргэний хэргийн анхан шатны шүүхийн баг хүрэл медаль хүртлээ.
Тэмцээний “Шилдэг довтлогч”-оор Улсын Дээд Шүүхийн багийн довтлогч Ц.Билгүүн, “Шилдэг хаалгач”-аар Дорноговь аймаг дахь Шүүхийн тамгын газрын багийн хаалгач Ч.Баатарчулуун, “Шилдэг хагас хамгаалагч”-аар Захиргааны хэргийн давж заалдах шатны шүүх, Нийслэлийн захиргааны хэргийн анхан шатны шүүхүүдийн хамтарсан багийн тамирчин П.Нармандах, “Шилдэг хамгаалагч”-аар аянзүрх, Сүхбаатар, Чингэлтэй дүүргийн Иргэний хэргийн анхан шатны шүүхийн багийн тамирчин И.Амартөгс нар тодорлоо.
Тэмцээний ерөнхий шүүгчээр Монголын хөлбөмбөгийн холбооны Дорноговь аймгийн Замын-Үүд сум дахь салбарын тэргүүн Ч.Батзангиа, шүүгчээр Б.Лхагвабаатар, шугамын шүүгчээр Б.Онцгойбаяр, Э.Мөнхнаран нар ажиллаж мэргэжлийн түвшинд зохион байгуулсан бөгөөд тэмцээний үеэр ямар нэгэн маргаантай зүйл гараагүй төдийгүй тэмцээнд оролцсон багуудын тамирчид буюу шүүхийн ажилтнууд нөхөрсөгөөр танилцаж цаашдын эргэх холбоо тогтоосон ач холбогдолтой тэмцээн болсон юм.
Дорноговь аймаг дахь шүүхийн тамгын газрын баг тамирчид өмнө оны амжилтаа бататган уг тэмцээний шөвгийн дөрөвт дахин шалгарсан юм.
            Уг тэмцээнийг 2020 онд зохион байгуулах эрхийн батламжийг Дорноговь аймаг дахь шүүхийн тамгын газрын дарга Б.Бээжин Захиргааны хэргийн давж заалдах шатны шүүх, Нийслэлийн Захиргааны хэргийн анхан шатны шүүхийн хамтарсан багийн хамт олонд тэмцээний шагнал гардуулах ажиллагааны үеэр гардуулан өглөө.


шаблоны для dle 11.2

ИРГЭН ТАНД

ХЭРЭГЦЭЭТ ХОЛБООС



Pdf download