Дорноговь аймаг дахь Эрүүгийн хэргийн анхан шатны шүүхийн 2022.12.06-ны өдрийн 217 дугаартай шийдвэр

Шүүхийн шийдвэрийн тойм №14 2023.02.15

Шийдвэрийн төлөв: Хуулийн хүчин төгөлдөр болсон

Прокуророос иргэн А-г олон нийтийн цахим сүлжээ болох фейсбүүкт иргэн Б-тэй маргалдаж улмаар түүний нэр төр, алдар хүндэд халдсан илт худал мэдээллийг олон нийтэд тарааж хуурамч бичвэр, сэтгэгдэл оруулсан гэх хэрэгт холбогдуулан яллах дүгнэлт үйлдэж гэм буруутай эсэхийг шийдвэрлүүлэхээр хэргийг шүүхэд шилжүүлсэн байна.

Монгол Улсын иргэн Үндсэн хуулийн Арван зургадугаар зүйлийн 16 дахь хэсэгт зааснаар “...үзэл бодлоо чөлөөтэй илэрхийлэх, үг хэлэх, хэвлэн нийтлэх ...эрх чөлөөтэй” боловч Үндсэн хуулийн Арван долдугаар зүйлд “хүний нэр төр, алдар хүнд, эрх, хууль ёсны ашиг сонирхлыг хүндэтгэх” үндсэн үүргийг ёсчлон биелүүлэхийг заасан.

Хүний нэр төр, алдар хүндийг гутаасан үйлдэл нь худал мэдээг амаар, бичгээр, элдэв дүрс бичлэг, хуурцаг болон хэвлэл мэдээллийн хэрэгслээр уг хүний нийгэмд үнэлэгдэх зүй ёсны бодит үнэлгээг доройтуулан, гажуудуулсан ойлголтыг олон нийтэд тараахад чиглэгдсэн мэдээлэл байх бөгөөд тарааж байгаа мэдээ нь уг хүний зан төлөв, үйл ажиллагааны үнэн бодит байдалд нийцэхгүй байхыг ойлгоно.

Уг гэмт хэрэг нь хүний нэр төр, алдар хүндийг гутаах гэсэн шууд санаатай, сэдэлт нь өш хонзон санах, үзэн ядах, атаархах явдал байдаг бөгөөд заавал олон хүнд тараасан байхыг шаардахгүй зөвхөн анхны хүнд мэдээлснээр төгсдөг онцлогтой юм.

Шүүхээс А-г фейсбүүк цахим хэрэгсэл ашиглаж хүний нэр төр, алдар хүндэд халдсан илт худал мэдээллийг олон нийтэд тараасан гэмт хэргийг үйлдсэн гэм буруутай тооцож хариуцлага хүлээлгэх үндэслэлтэй гэж дүгнээд, А-г гэм буруугаа хүлээн зөвшөөрсөн байдлыг нь харгалзан 500.000 төгрөгөөр торгох ял шийтгэж, сэтгэл санааны хохирол 15.000.000 төгрөгийг А-аас гаргуулж, Б-д олгохоор шийдвэрлэсэн.

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

Шүүхийн шийдвэрийг бүтнээр харах цахим холбоос:

Тоймыг бэлтгэсэн:Дорноговь аймаг дахь Сум дундын эрүүгийн хэргийн анхан шатны шүүхийн Ерөнхий шүүгч Ж.Байгалмаа